Í vikunni frá 13. til 20. maí voru 4 ökumenn kærðir fyrir að aka undir áhrifum fíkniefna. Við leit í bíl eins þeirra fann fíkniefnahundurinn Bea um það bil 10 grömm af ætluðu amfetamíni og um 2 grömm af ætluðu kókaíni.

62 ökumenn voru kærðir fyrir að aka of hratt, flestir innanbæjar en í vikunni var gert átak í mælingu á ökuhraða í þéttbýli á Selfossi. Fyrirhugað er að halda því áfram á næstu dögum og fara þá í Hveragerði, Þorlákshöfn Stokkseyri og Eyrarbakka og einnig í þéttbýlinu í uppsveitunum. Við eftirlitið verða m.a. notaðir ómerktir bílar.

Þrír ökumenn voru kærðir fyrir að tala í farsíma án handfrjáls búnaðar við akstur bifreiðar sinnar.

Höfð voru afskipti af réttindalausum manni sem ók óskráðu bifhjóli um götur og stíga í Reykholti. Sá má búast við sekt fyrir brot sitt. Þá var kvartað undan akstri fjorhjóla í fjörunni og melhólum austan Óseyrarbrúar í gær. Ekki náðist á gerendur en á þessu svæði er fuglavarp í blóma og ástæða fyrir menn að huga að því. Þá er rétt að minna á að akstur utan vega er bannaður.

Átta umferðaróhöpp voru tilkynnt til lögreglu í vikunni. Í einu þeirra fór bifreið fram af Grafningsvegi og hafnaði ofan í skurði um það bil 5 til 6 metrum neðar. Ökumaður og tvö börn voru flutt á sjúkrahús í Reykjavík. Börnin eru talin lítið eða óslösuð en ökumaðurinn er með áverka á baki.

Aðfaranótt sunnudags var ekið utan í gráa Mazda bifreið á bifreiðastæði við skemmtistaðinn Hvíta húsið á Selfossi. Ökumaður bifreiðarinnar fór af vettvangi án þess að tilkynna um slysið og óskar lögreglan eftir því að hafa tal af hugsanlegum vitnum að árekstrinum.

Þann 15. maí var tilkynnt um að utanborðsmótor hefði verið stolið úr bát við Haganesvík við Þingvallavatn. Um er að ræða Mariner mótor, silfurgráan að lit, 4 hestöfl.

Þann 17. maí var tilkynnt um þjófnað á farsíma úr húsi á Selfossi. Lögreglumenn við eftirlit fundu símann í fórum 17 ár stúlku sem þeir höfðu afskipti af daginn eftir og reyndist sú hafa verið gestkomandi í húsinu og launað fyrir gestrisnina með því að stela símanum.