Landsmót UMFÍ 50+ haldið í Hveragerði næsta sumar

Landsmót UMFÍ 50+ haldið í Hveragerði næsta sumar

Við undirritun samningsins. Hauk Valtýsson, formann UMFÍ, Aldísi Hafsteinsdóttur, bæjarstjóra, Guðríði AAdnegaard

Aldís Hafsteinsdóttir, bæjarstjóri Hveragerðis, Haukur Valtýsson, formaður UMFÍ, og Guðríður AAdnegaard formaður HSK tókust í hendur eftir undirritun samningsins. Mynd fengin hjá UMFÍ.

Forsvarsmenn Hveragerðisbæjar, UMFÍ og HSK skrifuðu undir samning um Landsmót UMFÍ 50+ sem haldið verður í blómabænum Hveragerði næsta sumar.

Landsmót UMFÍ 50+ verður haldið helgina 23.-25. júní 2017. Fyrsta Landsmót UMFÍ 50+ var haldið á Hvammstanga árið 2011. Á þessu ári var það haldið í byrjun júní á Ísafirði. Mótið í Hveragerði verður sjöunda mótið fyrir 50 ára og eldri sem UMFÍ heldur.

Gert er ráð fyrir miklum fjölda þátttakenda á mótið en mótið er fyrir fólk á aldrinum 50 ára og eldri. Boðið verður upp á fjölda íþróttagreina, allt frá sundi og bridds til þríþrautar. HSK er mótshaldari og er þetta í fyrsta sinn sem mótið er haldið á svæði HSK.

Í tilkynningu kemur fram að mótið hafi stækkað mikið frá því það var fyrst haldið og viðburðum í tengslum við það fjölgað. Mótið sýni að eftirspurn er eftir fjölbreyttu íþróttamóti hjá þessum aldurshópi.

Aldís Hafsteinsdóttir, bæjarstjóri í Hveragerði, sagði eftir að hún skrifaði undir samninginn vera spennt fyrir mótinu og bæjarbúa hlakka til.

Comments are closed.